ලොව ධනවත්ම යුවළවල් 07

විවිධ පුද්ගලයන් විවිධ ක්ෂේත්‍ර ඔස්සේ ලෝකයේ ජනප්‍රියත්වයට සහ ප්‍රසිද්ධත්වයට පත්වෙනවනෙ. ඔන්න ඉතිං අද අපි කතා කරන්න සූදානම් වෙන්නෙ ඒ විදිහෙ ගොඩක් ආකර්ෂණීය මාතෘකාවක් ඔස්සෙ ලෝකයේ අතිශය ජනප්‍රියත්වයට වගේම අවධානයට ලක්වුණු පිරිසක් ගැනයි.

ඒ තමයි තමන් සතු ධනය නිසා වැජඹෙම ලොව වැඩිපුරම ධනවත් යුවළ 07 කවුද කියන කාරණාව. කවුද මේ ? ඔවුන් මේ තරම් ධනවත් වුනේ කොහොමද ? හොයල බලන්න එකතු වෙන්න මේ ලිපියෙන් අපිත් එක්ක.

Salma Hayek සහ Francois Pinault

වත්කම ඇමෙරිකානු ඩොලර් බිලියන 7.1.සල්මා හයෙක් කියන්නෙ මෙක්සිකානු සම්භවයක් සහිත ඇමෙරිකානු නිළියක්, චිත්‍රපට අධ්‍යක්ෂකවරියක් වගේම හිටපු සුපිරි නිරූපිකාවක්ද වෙනවා. ඇය විවාහ වුනේ Kering (කෙරින්ග්) සමාගමේ ප්‍රධාන විධායක නිළධාරී (CEO) ෆ්‍රැන්කොයිස් හෙන්‍රි සමඟයි. ඇය ගර්භණී සමයේ සිටින විට ඔවුන් සිය විවාහය පිළිබඳ ප්‍රසිද්ධත්වයට පත්කළ අතර 2007 සැප්තැම්බර් 21 ඇය සිය දියණියට උපත ලබා දුන්නා. ඔවුන් විවාහ වුනේ 2009 පෙබරවාරි මාස 14 වැලන්ටයින් දිනයේදී වීම විශේෂයි.

Steven Spielberg සහ Kate Capshaw

වත්කම ඇමෙරිකානු ඩොලර් බිලියන 3.5.කේට් කියන්නෙ දරුවන් පස් දෙනෙක්ගෙ ආදරණීය මවක්. ඊට අමතරව ව්‍යවසායිකාවක්, නිරූපිකාවක්, ගායිකාවක් සහ රංගන ශිල්පිනියක්. ජුරාසික් පාක්, වෝ ඔෆ් ද වර්ල්ඩ් වගේ ජනප්‍රිය චිත්‍රපට අධ්‍යක්ෂණය කළ ස්ටීවන් බොහොම සාර්ථක චිත්‍රපට අධ්‍යක්ෂකවරයෙක්, නිෂ්පාදකවරයෙක්, ව්‍යවසායකයෙක් වගේම කතුවරයෙක් ලෙසත් කටයුතු කරනවා. ඔවුන්ගෙ විවාහයට මේ වෙද්දී අවුරුදු 32 ක් ගතවෙමිනුයි තියන්නෙ.

Oprah Winfrey සහ Stedman Graham

වත්කම ඇමෙරිකානු ඩොලර් බිලියන 3.4 .ඔප්‍රා වින්ෆ්‍රෙ කියන්නෙ ඇමෙරිකාවෙ ඉතාම ප්‍රභල චරිතයක් ලෙස අවිවාදයෙන්ම පිළිගැනෙන රූපවාහිනී වැඩසටහන් නිවේදිකාවක් වගේම රංගන ශිල්පිනියක්. ස්ටෙඩ්මන් අති සාර්ථක ව්‍යාපාරිකයෙක් වගේම දක්ෂ කථිකයෙක්. ඔවුන් දෙදෙනා එක්ව ජීවත් වීම අරඹන්නෙ 1986 දී. තමන් විවාහ වීමට සූදානම් බව 1992 දී ප්‍රසිද්ධ කළත් ඔවුන් අද වනතුරු විවාහා වී නැහැ.

Beyonce Knowles සහ Jay-Z

වත්කම ඇමෙරිකානු ඩොලර් බිලියන 1.8 .බියෝන්සේ සහ ජේ කියන්නෙ සාර්ථක විවාහයක් ගත කරන්නෙ කොහොමද කියල බොහොම ආදර්ශමත් පණිවිඩයක් ලොවට දෙන්න සමත් වුනු යුවළක්. අද වෙද්දී ඉතා ජනප්‍රිය සහ ධනවත්ව හිටියත් ඔවුන්ගෙ විවාහ ජීවිතයේදී විවිධ දුක් කම්කටොළු රාශියකට මුහුණ දෙන්න ඔවුන්ට සිද්ධ වුණා. මේ සියළු බාධක මැද ඔවුනොවුන් සමඟ සිටිමින් ඉතා සාර්ථකව පැමිණි ගමන් මඟක් තමයි ඔවුන්ට තිබෙන්නෙ. ලොව වැඩිම මිලක් අයකරන කාන්තාව ලෙස බියොන්සේ අවිවාදයෙන් පිළිගැනෙනවා.

Holly Valance සහ Nick Candy

වත්කම ඇමෙරිකානු ඩොලර් බිලියන 1.1.හොලි වැලන්ස් සහ නික් කැන්ඩි කියන්නෙ හරි අපූරු යුවළක්. වර්ෂ 2012 දි විවාහ වුනු ඔවුන්ට දරුවන් දෙදෙනෙක් සිටිනවා. මේ ආදරණීය යුවළ හැමවිටම එකිනෙකා ගැන ආදරණීය සහ විවෘත අදහස් නිරන්තරයෙන්ම ප්‍රසිද්ධියේ හුවමාරු කරගන්න අතරම හැකි සෑමවිටම කාලය, ධනය හා ආදරය අවශ්‍ය වූවන් වෙනුවෙන් යොදවන්න කටයුතු කරනවා. හොලී වැලන්ස් ඕස්ට්‍රේලියානු නිරූපිකාවක් වගේම නිළියක් වන අතර නික් කැන්ඩි අති සාර්ථක ව්‍යාපාරිකයෙක් විදිහට කටයුතු කරනවා.

Ivanka Trump සහ Jared Kushner

වත්කම ඇමෙරිකානු ඩොලර් මිලියන 800 . හිටපු ඇමෙරිකානු ජනාධිපති ඩොනල්ඩ් ට්‍රම්ප් සහ ඉවානා ට්‍රම්ප්ගේ දියණිය වන ඉවන්කා ට්‍රම්ප් සාර්ථක ව්‍යාපාරිකාවක්, කතුවරියක් වගේම හිටපු සුපිරි නිරූපන ශිල්පිනියක් ද වෙනවා. අනෙක් අතින් ජෙරාඩ් ඇමෙරිකාවේ ප්‍රසිද්ධ ආයෝජකයෙක්, නව නිෂ්පාදකවරයෙක් සහ දේශපාලන උපදේශකවරයෙක් විදිහට කටයුතු කරනවා. ඔවුන් විවාහ වෙන්නෙ 2009 අවුරුද්දෙදීයි.

George Clooney සහ Amal Clooney

වත්කම ඇමෙරිකානු ඩොලර් මිලියන 570.ජෝර්ජ් ක්ලූනි කියන්නෙ සාර්ථක නළුවෙක්, අධ්‍යක්ෂකවරයෙක් සහ නිෂ්පාදකවරයෙක්. අමාල් ක්ලූනි ලෙබනන් සහ බ්‍රිතාන්‍ය සම්භවයක් සහිත ක්‍රියාකාරී මානව හිමිකම් නියෝජිතවරියක්. මේ යුවළට ඇලෙක්ස් සහ එලා නමින් ආදරණීය දරුවන් දෙදෙනෙක් සිටිනවා.

කොතරම් ධනවත් වුවත් ඔවුන් තම ධනය රැස් කිරීමට සහ ආරක්ෂා කිරීමට වෙහෙස මහන්සි වී කටයුතු කරන බව අවිවාදයෙන් පිළිගත යුතු කරුණක්. අනෙකාගෙ ධනවත්කම දෙස බලා සිටිනවාට වඩා ඔවුන් ධනවත් වූයේ කෙසේද සහ ඔවුන්ගේ අප්‍රතිහත උත්සහය පිළිබඳ සොයා බැලීම ඉතා වැදගත් වෙන්නෙ ඒ නිසයි. එවිට ඔබේ සහකරු හෝ සහකාරිය සමඟ එක්ව ජීවන මඟ ජය ගැනීම කරන්න ඔබටත් පුළුවන්. 

(සටහන – දුලානි නවෝද්‍යා)

(Gagana.lk)